Тошкентда шахмат бўйича “Президент кубоги” халқаро турнири старт олди ФОТОГАЛЕРЕЯ

Маълумки, Ўзбекистон Республикаси Президентининг 2021-йил 14-январдаги “Шахматни янада ривожлантириш ва оммавийлаштириш ҳамда шахматчиларни тайёрлаш тизимини такомиллаштириш чора-тадбирлари тўғрисида”ги қарорида мамлакатимизда шахматни янада оммалаштириш, спортчиларимизнинг ФИДЕ рейтингидаги ўрнини ошириш мақсадида ҳар йили Ўзбекистонда 5та халқаро шахмат турнирини ўтказиш белгиланган. Президент соврини учун ўтказилаётган халқаро турнир ҳам айнан шу мақсадда ташкил этилди.

“Президент кубоги” халқаро шахмат турнири Ўзбекистон шахмат федерацияси томонидан ФИДЕ кўмагида ҳамда Туризм ва спорт вазирлиги билан ҳамкорликда ўтказилмоқда.

Бугун Президент кубоги халқаро турнирига бағишланган матбуот анжумани ташкил этилди. Унда Ўзбекистон шахмат федерацияси раҳбарияти, турнир рефериси, арманистонлик таниқли халқаро ҳакам Ашот Вардапетян, турнир директори Аҳмаджон Эркабоев ҳамда оммавий ахборот воситалари ходимлари иштирок этди.

Даставвал ОАВ вакилларига мусобақа ҳақида қисқача маълумот берилди. Бугунги пандемик вазиятда “Президент кубоги” халқаро турнирига дунёнинг 10га яқин мамлакатидан 27 нафар гроссмейстер, 16 нафар халқаро мастер, кўплаб ФИДЕ устаси ҳамда спорт усталари иштирок этишаётгани мусобақанинг нуфузи анча юқори эканлигидан дарак беради.

Матбуот анжуманида сўз олган мусобақа рефериси Ашот Вардапетян бугунги кунда юртимиз шахматчилари дунё рейтингида ўз ўрнига эга эканлигини алоҳида таъкидлаб, жуда кўплаб давлатлар “Шахматни янада ривожлантириш ва оммавийлаштириш ҳамда шахматчиларни тайёрлаш тизимини такомиллаштириш чора-тадбирлари тўғрисида”ги Президент қарорига ўхшаган ҳужжатларнинг қабул қилинишини фақат орзу қилишини ҳам эътироф этди.

Шунингдек, анжуманда сўзга чиққан А.Эркабоев бугунги кунда ўзбек шахматида етишиб чиқаётган иқтидорли ёшларимиз ҳақида тўхталиб, уларни ўзбек шахматининг олтин авлоди, дея эътироф этди. Қолаверса, Президент қарори имзоланганда Ўзбекистон ФИДЕ рейтингида 30-ўринни эгаллаб турган бўлсаА, бугунги кунда 26-ўринга кўтарилганини ва йил якунига қадар мавқеи янада юксалишини ҳам айтиб ўтди. Агар ютуқларимиз шу зайлда давом этса, Ўзбекистон 2025 йилга бориб бемалол дунё рейтингида кучли ўнталикка киришига ишонч билдирди.

Сўнгра турнирнинг расмий очилиш маросими бўлиб ўтди. Унда Туризм ва спорт вазирининг ўринбосари Авазжон Каримов иштирок этди ва барча шахматчиларга омад тилади. Айнан вазир ўринбосари ҳамда жаҳоннинг 17-чемпиони, ҳамюртимиз Рустам Қосимжонов рамзий юриш билан халқаро турнирни очиб беришди.

Халқаро турнир швейцарча тизим бўйича икки босқичда – гуруҳ босқичи ярим финал (онлайн) ва финал (7 тур, тахта устида), шунингдек, асосий босқич (10 тур) бўйича ўтказилади.

Мусобақада қуйидаги давлатлар вакиллари иштирок этишмоқда: Озарбайжон – 1 нафар, Беларусь – 3, Эрон – 1, Қозоғистон – 16, Россия Федерацияси – 7, Тожикистон – 3, Украина – 8, АҚШ – 4 ҳамда Ўзбекистон – 61 нафар.

Асосий босқич учун рўйхатдан ўтган барча шахматчилар бугун блиц-турнирда иштирок этишди.

Халқаро турнирда Ўзбекистон шарафини Нодирбек Абдусатторов, Нодирбек Ёқуббоев, Шамсиддин Воҳидов, Жаҳонгир Воҳидов, Жавоҳир Синдаров каби ёш ва иқтидорли гроссмейстерларимиз ҳимоя қилишади.

Эслатиб ўтамиз, “Президент кубоги” халқаро турнирининг умумий мукофот жамғармаси 120 000 АҚШ долларини ташкил қилади.

Суратлар муаллифи - Алимурод МАМАДАМИНОВ, ўз мухбиримиз