Тошкентда волейбол бўйича Марказий Осиё чемпионати бошланди ФОТОРЕПОРТАЖ

Осиё волейбол конфедерацияси ҳамда Марказий Осиё волейбол ассоциациясининг 2023 йилги тақвим режасига асосан иккита йирик мусобақа ўтказиляпти. Улардан бири ёшлар ўртасидаги Марказий Осиё чемпионати бўлса, иккинчиси 16 ёшгача бўлган ўғил болалар иштирокидаги Осиё чемпионатидир.

Марказий Осиё чемпионатида 5 та мамлакат, Осиё чемпионатида эса қитъанинг 20 давлати терма жамоалари иштирок этяпти. Кеча ёшлар ўртасидаги Марказий Осиё чемпионати баҳсларига старт берилди. 

Шу куннинг ўзида мусобақанинг тантанали очилиш маросими ҳам бўлиб ўтди. Унда Осиё волейбол ассоциацияси, ёшлар сиёсати ва спорт вазирлиги, мамлакат волейбол федерацияси мутасаддилари иштирок этди.

Бугун қизлар ўртасида Ўзбекистон-1 ҳамда Ўзбекистон-2, Қозоғистон ва Тожикистон жамоалари ўртасида беллашувлар бўлиб ўтади. Ўғил болалар ўртасидаги баҳслар куннинг иккинчи ярмида ўтказилиши режага киритилган. Унда Эрон - Қозоғистон, Ўзбекистон - Покистон жамоалари ўз маҳоратларини синовдан ўтказадилар.

Ўғил ва қиз болалар ўртасида ўтказилаётган Марказий Осиё чемпионати баҳслари 19 июль санасида ниҳоясига етади. 20-30 июль кунлари эса 16 ёшгача бўлган ўғил болалар ўртасида Осиё чемпионати баҳслари бўлиб ўтади.

Алимурод МАМАДАМИНОВ, ўз мухбиримиз