Тошкентдаги халқаро турнирда Ўзбекистон кикбоксинг терма жамоаси биринчи бўлди + ФОТОГАЛЕРЕЯ

Мусобақада 22 мамлакатдан 10 ёшдан 40 ёшгача бўлган 2000 га яқин моҳир кикбокс усталари медаллар учун баҳс олиб боришди. Халқаро турнирнинг сўнгги куни аввалига 10 та вазн тоифасида ҳаваскорлар ўртасидаги финал жанглари бўлиб ўтди. 

Ҳамюртларимиздан -52 кг вазнда рингга чиққан Назарбек Маҳмудов ҳиндистонлик Дас Ишанни, Лазизбек Бегматов (-57 кг) қозоғистонлик Талгат Букбассаровни, Ислом Турсунқулов (-67 кг) қирғизистонлик Эрлан Байзаковни, Умар Алибеков (-71 кг) туркиялик Ҳакан Карагозни, ҳамюртларимиз иштирокидаги жангда Сулаймон Солиҳов (+91 кг) Бекзод Равшановни мағлубиятга учратиб, "Uzbekistan Open 2" халқаро турнири ғолибига айланишди. 

Қолган вазн тоифаларида эса иорданиялик Адай Алмахармен (-63,5 кг), туркманистонлик Гочмират Жуманиязов (-75 кг), исроиллик Юлия Сачкова (-48 кг), қозоғистонлик Батирхан Куандиков (-67 кг), қирғизистонлик Адилет Бекжан уулу (-75 кг) олтин медаль ҳамда 300 евро мукофот пулини қўлга киритишди. 

Якунда умумжамоа ҳисобида Ўзбекистон кикбоксчилари 10 та вазндан 5 тасида ғолиб чиқиб, биринчи ўринни банд этишди. Қозоғистон иккинчи ўринни банд этган бўлса, кучли учликка Тожикистон терма жамоаси якун ясаб берилди. Совринли учлик терма жамоаларига махсус Кубоклар топширилди.

Суратлар муаллифи - Алимурод МАМАДАМИНОВ, ўз мухбиримиз