"Туғруқдан сўнг ўзимни гўзал ва кучли ҳис қила бошладим". UFC гўзали фарзандлик бўлгандан тўрт ой ўтиб жангларга қайтди + ФОТОГАЛEРEЯ

Унинг ота-онаси жиу-житсу бўйича қора белбоғ соҳиблари бўлишган. Қизалоқ уч ёшидан бошлаб спорт залга бориб, машғулотларда қатнашишни бошлайди. Унга отасидан ташқари жиу-житсу афсоналари Хойлер Грейси ва Летисия Рибейро ҳам машғулотларда ёрдам беришган. Дерн ёшлар ўртасидаги мусобақаларда йўлида учраган барча рақибларини мағлуб этиб, бир нечта нуфузли мусобақаларда ғалаба қозонган. 

У жиу-житсу билан биргаликда 14 ёшидан бошлаб дзюдо билан ҳам шуғулланишни бошлайди. 20 ёшига келиб қора белбоғ соҳибасига айланади. Шундан сўнг Маккензи ўзи учун янги даража аралаш яккакураш спорти билан шуғулланишга қарор қилади.

 ММАдаги фаолиятини LFC промоушенида бошлайди. У қўл зарбаларига қаттиқ эътибор беради, лекин унинг асосий кучи кураш бўлиб қолаверади. Дерн LFCда жами тўртта жангда иштирок этиб, барчасида ғалаба қозонишга эришади. Шундан сўнг у Invista билан ҳамкорлик қилади ва у ерда ҳам битта жангда иштирок этиб, оғритиш усули билан ғалаба қозонади. 

Кетма-кет ғалабалардан сўнг у билан сайёрамизнинг энг кучли ММА промоушени - UFC билан шартнома имзолашга қарор қилади ва бунга эришади. Илк жангида у Эшли Эдерга қарши жанг ўтказиб, очколар ҳисоби бўйича ғалабани тантана қилди. Бу ғалабадан сўнг Дерн икки ой ўтиб, Аманда Куперга қарши жанг қилиши лозим эди. Лекин фаолияти давомида учинчи марта керакли вазнга туша олмайди. Шунга қарамасдан Купер Дернга қарши ўрта вазнда жанг қилишга рози бўлади. Биринчи раунднинг ўзида Дерн рақибасини мағлуб этади.

Бу ғалабадан сўнг Дерн фаолиятида танаффус олишини маълум қилди. Сабаби у она бўлиш арафасида эди. У 2019 йилнинг июнь ойида саҳифамиз қаҳрамони қиз фарзандлик бўлди. Она бўлганидан сўнг бир ой ўтиши билан машғулотларга қайтган Дерн тезда UFCда жанг қилиш истагини билдирди. Аммо, ташкилот раҳбарияти бундай қарорни қабул қилишга қўрқди, чунки улар яқинда фарзандлик бўлган аёлнинг соғлиғига зарар етказиш ниятида эмас эдилар. Маккензи эса туғруқдан сўнг ўзини анча яхши ҳис қилаётганини, кучли ва гўзал бўлиб бораётганини таъкидлайди.

Шу тариқа, Дерн туғруқдан тўрт ой ўтиб UFCдаги навбатдаги жангини ўтказди. Аманда Рибасга қарши кечган баҳсда Маккензи очколар ҳисобига кўра имкониятни бой бериб қўйди.