Уч курашчимиз Эронда ўтказилаётган Паҳлавон Маҳмуд турнири 1/2 финалига чиқди + ФОТОГАЛЕРЕЯ

Ўзбекистон Республикаси Президенти соврини учун Паҳлавон Маҳмуд хотирасига бағишлаб ўтказилаётган халқаро турнирида дунёнинг кўплаб давлатларидан сара курашчилар гиламга чиқяпти. Юртимиз шарафини Ризамат Солиев мураббийлигидаги терма жамоамиз курашчилари ҳимоя қилишмоқда. 

Кураш баҳсларига 50 000 томошабинни ўз бағрига сиғдира олувчи "Zeinal-Khan Traditional Wrestling Arena" мезбонлик қилмоқда. Кеча мусобақанинг илк куни белгиланган иккита вазн тоифасида саралаш беллашувлари ўтказилиб, 1/2 финалга йўл олган курашчилар маълум бўлди. 

Тўрт нафар курашчимиздан биргина Умар Бозоров (-90 кг) саралаш босқичида тожикистонлик полвонга имкониятни бой бериб, мусобақадаги иштирокини якунлади. Алихон Нодиров (-90 кг), Асрор Ҳамидов (+90 кг) ва энг совриндор курашчимиз Муҳсин Ҳисомиддинов (+90 кг) 1/2 финал иштирокчисига айланишди. 

Бироздан сўнг бошланадиган 1/2 финалда Алихон Нодиров тожикистонлик Ҳақназар Назаровга, Асрор Ҳамидов яна бир тожик курашчиси Шарифжон Назировга, Муҳсин Ҳисомиддинов эса россиялик полвон Антон Брачовга қарши гиламга чиқади.

Маълумот учун, мусобақанинг умумий мукофот жамғармаси 10 000 АҚШ доллари бўлиб, ғолиблар 3000 долларга эга бўлади. Кумуш медаль соҳиблари 1000, бронза медалга эга чиққанлар ўз ҳамёнларини 500 долларга бойитиб олишади.