Уч нафар боксчи қизимиз Алматидаги турнирда чемпион бўлди

Олимпиада чемпиони Ермахан Ибраимов соврини учун ўтказилган анъанавий мусобақада 2006-2007 йилларда таваллуд топган жами 113 нафар боксчи рингга кўтарилди. Ўн икки вазн тоифасида ташкил этилган турнирда Ўзбекистон терма жамоаси аъзолари ҳам ўз имкониятларини синовдан ўтказишди. 

Осиё чемпионатига тайёргарлик босқич вазифаини ўтаб берган ушбу мусобақанинг 9 та вазн тоифасида қозоғистонликлар, қолган 3 тасида эса бизнинг боксчилар олтин медални қўлга киритишди. 

Боксчи қизларимиздан Раҳима Бекниёзова (-60 кг), Ҳилолахон Машрабова (-50 кг) ва Жасмин Тоҳирова (-48 кг) ўз вазнларида шоҳсупанинг энг юқори поғонасига кўтарилишди.

Қозоғистон ёшлар терма жамоаси сафида Панар Сейтханкизи (+81 кг), Аружан Зейнуллаева (-81 кг), Шугила Налибай (-75 кг), Алмира Абдураимова (-70 кг), Дина Шанапек (-66 кг), Толганай Касимхан (-63 кг), Аяжан Сидик (-57 кг), Лия Абдуллаева (-54 кг) ва Багжан Отинбай (-52 кг) олтин медалга сазовор бўлди.