Уч нафар ёш гроссмейстеримиз Абу-Дабида маҳоратини намойиш этяпти

26th Abu Dhabi International Chess Festival мусобақасида 27 давлатдан 150 нафар шахматчи ғолиблик йўлида дона суряпти. Улардан 55 (34 халқаро гроссмейстер) нафарининг гроссмейстер эканлиги ушбу турнирнинг нуфузидан дарак бермоқда. Украиналик халқаро гроссмейстер Юрий Криворучко (2686) мусобақанинг рейтинг-фаворити ҳисобланади. 

Абу-Дабидаги шахмат фестивалида юртимиз шарафини уч нафар ёш гроссмейстеримиз Нодирбек Абдусатторов, Нодирбек Ёқуббоев, Жавоҳир Синдаров ҳамда яна бир шахматчимиз, спорт шарҳловчиси Акром Тошхўжаев ҳимоя қилмоқда. 

Бешинчи турда Абдусатторов (2594) оқ доналарда ҳаракат қилишига қарамай, рейтингда ўзидан юқорида турган эронлик халқаро гроссмейстер Парҳам Мақсудлу (2656)га ютқазиб қўйди. Учрашув олдидан ҳар икки шахматчи ҳам 3,5 тадан очкога эга бўлиб туришганди.

Нодирбек Ёқуббоев (2574) эса аксинча қора доналарда ўйнашига қарамай, арманистонлик халқаро гроссмейстер Владимир Акопян (2650)ни таслим этишнинг уддасидан чиқди. Бу икки гроссмейстер 3 очкодан жамғаришган эди. 

Жавоҳир Синдаро (2507) бу турда оқ доналарда ҳиндистонлик гроссмейстер Сури Вайбхав (2591) билан муросага келди. Акром Тошхўжаев (2123) хитойлик Ни Ши Гун билан дуранг ўйнади. 

Бугун ўтказиладиган 6-тур олдидан грузиялик халқаро гроссмейстер Баадур Жобава (2584) юз фоизлик кўрсаткич, яъни 5 очко билан якка пешқадам бўлиб турибди. Эронлик Парҳам Мақсудлу 4,5 очко билан иккинчи, ҳамюртимиз Нодирбек Ёқуббоев қўшимча кўрсаткичларга кўра 4 очко билан учинчи ўринни банд этган.