Учта вазнда собиқ жаҳон чемпиони бўлган боксчи Муроджон Аҳмадалиевга жанг таклиф қилди

Маълум қилинишича, Касимеро 6 июнь куни Япониянинг Айти шаҳрида бўлиб ўтган проф бокс оқшоми доирасида мексикалик Луис Нерини тўртинчи раундда нокаутга учратганидан сўнг ўзининг кейинги рақиблари ҳақида гапирган. Дастлаб у мутлақ жаҳон чемпиони Наоя Иноуэни жангга чақирган бўлса, кейинчалик Муроджон Аҳмадалиев билан рингга чиқишни хоҳлашини айтган.

Боксга ихтисослашган қатор манбалар ва ижтимоий тармоқларда тарқалган маълумотларга кўра, филиппинлик боксчи Иноуэга қарши жанг ҳозирча амалга ошмаслиги мумкинлигини таъкидлаб, диққатини Аҳмадалиевга қарши эҳтимолий тўқнашувга қаратган.

Ҳозирча мазкур жанг бўйича расмий музокаралар бошлангани ёки томонлар ўртасида келишув мавжудлиги ҳақида маълумот йўқ. 

Эслатиб ўтамиз, Муроджон Аҳмадалиев (15-2-0) иккинчи энг енгил вазн тоифасида WBA ва IBF йўналишлари бўйича собиқ жаҳон чемпиони саналади. 37 ёшли Жон Риэль Касимеро (36-5-1) эса фаолияти давомида учта вазн тоифасидаги турли камарларга эга чиққан.