"Уфа" Остон Ўрунов ва бошқа легионерларга жавоб бериб юборди

Бу ҳақда клуб бош директори Шамиль Газизов маълум қилди. "Уфа"да ҳамюртимиз Остон Ўрунов ҳам тўп тепишидан хабарингиз бор.

"Хорижлик ўйинчиларимиз? Биз уларни 30 майга қадар ўз уйларига кетишга руҳсат бердик. Агар чемпионат июнь ойи охирида қайта бошланса жуда яхши бўларди. Агар легионерлар карантин сабаб қайтиб учиб кела олишмаса, чемпионатни россиялик футболчилар билан тугатиб қўямиз. Ҳеч қиси йўқ", - дея Газизовнинг сўзларини келтирди "Уфа" матбуот хизмати.

Эслатиб ўтамиз, "Уфа" айни пайтда Россия чемпионатида 22 турдан сўнг 27 очко билан 16 жамоа орасида 9-ўринда бормоқда.

Уфаликлар таркибида Остондан ташқари легионерлардан Боян Йокич (Словения), Ионуц Неделчару (Руминия), Жемал Табидзе (Грузия), Кэтэлин Карп (Молдова), Оливье Тилль (Люксембург), Ловро Бизяк (Словения) ва Андрес Вомбергар (Аргентина)лар тўп тепишади.