UFC 257. Конор Макгрегор ва Маҳмуд Мурадов жанг қиладиган турнир Ўзбекистонда жонли эфирда намойиш этилади

Унга сайёрамизнинг энг кучли курашчилари йиғилади. Мусобақага бўлган катта қизиқиш ва томошабинлар мурожаатларини ҳисобга олган ҳолда, "UzReport TV" телеканали Ўзбекистон ҳудудида мусобақа трансляцияси эксклюзив ҳуқуқини харид қилди.

Мусобақа Абу-Даби (БАА) шаҳри яқинидаги «UFC жангчилар ороли» спорт мажмуаси таркибидаги Яс оролида жойлашган «Flash Forum» спорт аренасида 24 январь куни тонгги соат 05:00да бошланади.

Мусобақанинг асосий жангида Конор Макгрегор ва Дастин Поре октагонга чиқади. Бу реванш жанг бўлиб, биринчи тўқнашувда Конор ғалаба қозонган эди.

Ўзбекистонлик мухлислар учун мазкур мусобақанинг яна бир аҳамиятли томони шундаки, унда ҳамюртимиз Маҳмуд Муродов ўзининг UFCдаги 3-жангини ўтказади. Унга Эндрю Санчес рақиблик қилади.

Мазкур мусобақани такроран 24 ва 25 январь кунлари соат 21:00да "UzReport TV"да томоша қилишингиз мумкин.