UFC 263 турнири бошланди, Евлоевда кетма-кет бешинчи ғалаба + ФОТО

Бироз аввал "Хил Ривер-Арена"да ўтаётган UFC 263 турнирининг прелиум кардидан ўрин олган жангларнинг бирида россиялик 27 ёшли Мовсар Евлоев канадалик 29 яшар Ҳаким Даводуга қарши октагонга кўтарилди. Уч раунд тўлиқ давом этган баҳсда Евлоев очколар ҳисобига кўра ғалаба қозонди – 29-27, 29-27, 29-27.

Бу билан Мовсар ватандоши Зубайра Тухуговнинг мағлубияти учун Ҳакимдан реванш олди. Ўтган йилнинг 27 сентябрь куни ўтказилган жангда Даводу Зубайра Тухуговни очколар бўйича мағлубиятга учратган эди. 

Шу тариқа, Мовсар Евлоев UFC промоушенидаги кетма-кет бешинчи ғалабасига эришди. У мағлубиятсиз сериясини давом эттирмоқда. Унинг ММА`даги натижаси - 14 ғалаба! Даводу эса охирги 5 та жангидан иккинчисида мағлубият аламини тотиб кўрди. 

Эслатиб ўтамиз, UFC 263 турнирининг марказий жанги ўрта вазн тоифасида ташкилот чемпиони Исраэль Адесанья ҳамда даъвогар италиялик Марвин Веттори ўртасида бўлиб ўтади.