UFC 301 турнирининг асосий кардида жанг қиладиган Маҳмуд Мурадов Прагада!

Хабарингиз бор, ўрта вазн тоифасида ўз жангларини ўтказиб келаётган ҳамюртимиз 4 май куни Бразилиянинг Рио-де-Жанейро шаҳрида ташкил этиладиган UFC 301 турнирида октагонга чиқади. Ўша куни Мурадовга бразилиялик Мишель Перейра рақиблик қилади.

Ушбу жангга тайёргарликнинг илк босқичини Тошкентда ўтказган юртдошимиз кеча Истанбул орқали Чехия пойтахти Прага шаҳрига етиб борди. Ўқув-машғулот йиғинининг иккинчи босқичи Мурадовнинг иккинчи ватанига айланган Чехияда ўтказилади. 

"Прагада машғулотларни ўтказиш учун етиб келдим. Риога жўнаб кетиш олдидан сўнгги ўқув-машғулот йиғини Польшада ташкил этилади. Унда спарринглар ҳам ўтказамиз. Бир неча йилдан бери асосий машғулотларим Чехия ва Польшада ўтказиб келинмоқда. Бу сафар ҳам анъанага содиқ қоламиз", - дейди Мурадов сайтимиз мухбири билан суҳбатда. 

Маълумот учун, 30 ёшли Мишель Перейра фаолияти давомида 42 та жанг ўтказиб, 30 ғалаба ва 12 мағлубият қайд этган. У охирги жангини 9 март куни Михал Олексейчукка қарши ўтказиб, муддатидан олдин зафар қучган эди. Қизиғи, Перейра ўзининг охирги 6 та жангида ғалаба қозонган.