UFC чемпиони Илия Топуриянинг янги вазнга ўтаётгани тасдиқланди

Бу маълумот расман ўз тасдиғини топди. Испания шарафини ҳимоя қилаётган асли грузиялик аралаш яккакураш устаси ярименгил вазн чемпионлигини вакант қолдириб, енгил вазнда фаолиятини давом эттиради. Бу вазнда амалдаги UFC чемпиони Ислам Махачев ҳисобланади.

"Илия ҳар бир жанги олдидан кўп миқдорда вазн ташлашига тўғри келади. Бу ишни ҳар сафар такрорлаш жуда оғир ва мушкул жараён. У ортиқ бундай қилмоқчи эмас. Илия бу оғир жараён давом этишини хоҳламайди. Топуриянинг вазни 85 килограммгача кўтарилади. Жанг пайти эса 66 кг бўлиши шарт. Йигирма килограмм вазн ташлаш организмни қийнаб қўяди. Аслида ҳам шундай бўляпти. Илия тез кунда чемпионлик камарини вакант қолдиради", дея Submission Radio каналига интервью берди Илия Топуриянинг мураббийи Хорхе Климент.

Шунингдек, Климент шогирдининг май ойида енгил вазнда собиқ UFC чемпиони Чарльз Оливейрага қарши октагонга чиқмоқчи бўлаётганини ҳам қўшимча қилди. Бразилиялик бу жангга рози бўлмаса, у ҳолда америкалик Дастин Порье варианти кўриб чиқилади. Порьенинг ўзи ҳам Топурия билан жанг ўтказишга қарши эмаслигини айтган.