UFC Fight Night 278 бонус соҳиблари маълум. Гусковнинг эҳтимолий рақиби ҳам 100 000 долларлик чек олди

Мағлубият нималигини билмай келаётган польшалик ярим оғир вазн тоифаси вакили Иво Бараневский ҳам бугунги ёрқин ғалабаси учун бонусга лойиқ кўрилди. У жангнинг 85-сониясидаёқ Янги Зеландия вакили Жуниор Тафани техник нокаутга учратган эди. Икки лоу-кик зарбасидан кейин рефери Дэн Мираглиотт жангни тўхтатишга мажбур бўлди. Иво бугунги ғалабаси учун 100 минг доллар миқдоридаги бонусга эга чиқди. 

"Оқшом чиқиши" учун мўлжалланган иккинчи бонус ўта енгил вазн тоифаси вакили мексикалик Эдгар Чайрезга насиб этди. У Бруно Сильвани апперкот зарбаси билан нокдаун ҳолатига туширди ва кейин ортдан бўғиш усулида бразилиялик рақибини таслим қилди. 

"Оқшомнинг энг яхши жанги" сифатида америкалик ўрта вазн тоифаси вакиллари Брендан Аллен ва Эдмен Шахбазян ўртасидаги тўқнашув тан олинди. Ҳар икки жангчи ҳам уч раундлик оловли жанг учун 100 минг доллардан бонусга эга бўлди. Ушбу жангда Аллен ҳакамларнинг қарорига кўра ғалаба қозонди.

Рақибларини муддатидан аввал мағлубиятга учратган Брайс Митчелл, Алессандро Коста, Челси Чендлер, Жоандерсон Брито ва Кетлин Соуза эса қўшимча 25 000 доллар миқдоридаги бонусни қўлга киритди.