UFC икки ҳафтагина ўз сўзида турди

Уайт икки ҳафта олдин жангчиларга ўз давлати байроғи ва рамзлари билан октагонга чиқиш учун рухсат берганди. Аммо орадан ҳеч қанча вақт ўтмай, ташкилот UFC 294 турнири иштирокчилари учун рамзлар, хусусан байроқдан фойдаланмасликка норасмий тарзда буйруқ берди. 

Бу ҳақда Буюк Британия шарафини ҳимоя қилиб келаётган, асли доғистонлик ва бугун "Этиҳад Арена"да октагонга кўтариладиган Муҳаммад Мокаев хабар берди.

"UFC 294 турнирида ҳеч қандай байроқлар бўлмайди", - деб ёзган Мокаев ўзининг ижтимоий тармоқдаги саҳифаларида.

Шунингдек, бу маълумотни "Матч ТВ" каналига берган интервьюсида россиялик Виктория Дудакованинг мураббийи Гасанали Гасаналиев ҳам тасдиқлаган.

"Бизга бу сафар байроқ билан чиқмаслигимизни айтишди", - деди россиялик мутахассис.

Бир ҳафта аввалги UFC турнирида Ирина Алексеева Россия, бразилиялик Мишель Перейра эса кутилмаганда Исроил байроғи билан октагонга чиққан эди. Перейранинг бу хатти-ҳаракати Фаластинга қайғураётганлар томонидан жиддий эътирозларга сабаб бўлганди. 

Маълумотларга қараганда, айнан бразилияликнинг бу иши UFC раҳбарларининг байроқ масаласидаги эркинликка қайта тақиқ қўйилишига сабаб бўлган. Бу чеклов фақат UFC 294 турнири учун бўладими ёки йўқ, ҳозирча бу маълум эмас.