UFC мафтункор Ванзантнинг жанги санаси ва манзилини эълон қилди

UFC промоушени берган хабарга кўра Ванзант 11 июль куни АҚШнинг Невада штати Лас-Вегас шаҳрида бразилиялик Аманда Рибасга қарши октагонга кўтарилади. Ушбу жанг UFC 251 турнири доирасида бўлиб ўтади. 

Ушбу жанг аввалдан кутилганидек 52 эмас, 57 кг вазн тоифасида ташкил этилади. Аслида Ванзант - Рибас жанги 14 март куни Бразилиядаги UFC Fight Night 170 турнири доирасида ўтказилиши керак эди. Лекин Бразилия пойтахтидаги мазкур жанг Ванзантнинг жарохати сабаб бекор қилинганди. Пейжнинг ўрнини эгаллаган Ранда Маркос эса Рибасга имкониятни бой бериб қўйганди.

Маълумот учун, 26 ёшли мафтункор Пейж Ванзант аралаш қоидалар жангидаги фаолиятини 2012 йилда бошлаган. 2014 йилдан эса UFC промоушени остида ўз жангларини ўтказиб келмоқда. У сўнгги жангини 2019 йилнинг январида Рэйчел Остовичга қарши ўтказиб, рақибасини иккинчи раундда мағлубиятга учратган эди.