UFC on ESPN 64 турнирининг асосий жанги эълон қилинди

29 март куни Мексиканинг Мехико шаҳрида навбатдаги UFC турнири ташкил этилади. Оқшомнинг марказий жанги ярименгил вазн тоифасида бразилиялик 30 ёшли Диего Лопес ҳамда UFC камари учун собиқ даъвогар, мексикалик 32 ёшли Яир Родригес ўртасида бўлиб ўтади. 

Маълумот учун, Лопес ўзининг сўнгги жангини 2024 йилнинг сентябрь ойида Брайан Ортегага қарши ўтказиб, ҳакамларнинг якдил қарори билан зафар қучган ва ғалабали сериясини 5 та жангга етказганди. Родригес эса ўтган йилнинг февраль ойида айнан Ортегага ютқазиб қўйганди. Брайан учинчи раундда Яирни бўғиб қўйганди. Бу мексикаликнинг кетма-кет иккинчи мағлубияти бўлган эди.