UFC собиқ жангчиси Зарруҳ Адашев навбатдаги жангини қачон ва қаерда ўтказишини айтди

Ўзбекистонлик UFC собиқ жангчиси Зарруҳ Адашев ижтимоий тармоқлардаги саҳифаси орқали навбатдаги жанги бўйича тафсилотларни маълум қилди.

Унга кўра, Адашев навбатдаги жангини 2023 йил февраль ойида, АҚШнинг Нью-Жерси штатида ўтказади. Ҳозирча унинг рақиби ҳақида маълумотлар йўқ.

"Ҳамма мендан сўраяпти қачон кейинги жанг, деб. Раҳмат қизиққанларингиз учун, кейинги жангимни февраль ойида Нью-Жерси штатида уюштирмоқчилар. Ҳаммаларингизни кутаман, яқин ораларда хабарини берамиз, Худо хохласа", - деб ёзган Зарруҳ Адашев.

Адашев мазкур жанг қайси промоушенда ўтказилишига аниқлик киритмаган.

Заррух Адашев UFC'да тўртта жанг ўтказиб, уларнинг учтасида мағлуб бўлган, биттасида ғалаба қозонган эди.