25 янв 11:53
Янгиликлар

Бокс/ММА

UFC янги бонуслар тизимини амалиётга киритди

Paramount платформасида UFC’нинг янги телевизион даври бошланиши билан дунёнинг энг кучли Лигаси ўз жангчилари учун янада томошабоп жангларни кўрсатишга ва ҳакамлар қароридан қочишга ундайдиган янги рағбатлантириш тизимини жорий этди.

Бироз аввал Лас-Вегасда якунига етган UFC 324 турниридан бошлаб, "Оқшом намойиши" ва "Оқшом жанги" учун стандарт бонуслар миқдори 50 минг доллардан 100 минг долларгача оширилди.

Бундан ташқари, Лига жангни муддатидан олдин якунлаган ҳар бир жангчига қўшимча 25 минг доллар миқдорида мукофот пули тўлайди, фақат бир шарти - агар у турнирнинг асосий бонуси - 100 минг долларни олмаган бўлса.

Эслатиб ўтамиз, UFC 50 минг долларлик турнир бонусларига 2014 йилда ўтган - шу пайтгача ушбу тўловлар тадбир ҳажмига қараб ўзгариб турган ва 40 дан 75 минг долларгача.

Лига раҳбари Дана Уайт аввал ҳам бонусларни оширилган миқдорда жангчиларга тақдим этганди. Масалан, UFC 300 юбилей турнирида бонус 300 минг долларгача оширилди. Лекин UFC 304 турнирида ўн тўртта жангдан тўққизтаси 100 минг долларлик бонуслар билан ҳал бўлганидан сўнг, Дана бошқа ҳеч қачон бундай қилмасликка ваъда берганди.