Уимблдон. Дунёнинг биринчи ракеткаси мағлуб этилди

Бироз кутилмаганда дунёнинг биринчи ракеткаси Янник Синер мусобақадаги иштирокини 1/4 финалда якунлади. Рейтингнинг бешинчи поғонасида бораётган россиялик Даниил Медведев роппа-роса 4 соат чўзилган беш сетлик учрашувда италиялик номдор рақибини мағлуб этишни уддалади - 6/7(7), 6/4, 7/6(4), 2/6, 6/3.

Медведев 1/2 финалга чиқиш баробарида Синнердан қабул қилиб олинган 5 та мағлубиятдан иборат нохуш серияга ҳам якун ясади. Теннисчиларнинг ўзаро учрашувларидаги ҳисоб Даниил фойдасига бўлиб турибди - 7:5. Медведев 15, Синнер 17 та эйс зарбасини амалга оширган. Иккала теннисчи ҳам 3 тадан брейкка эришган. Қўшхатолар рус теннисчисида кўпроқ бўлди - 11 га 4! 

Даниил Медведев фаолиятида тўққизинчи маротаба "Катта Дубулға" турнирларининг ярим финалида ўйнайди. У ўтган йили ҳам Уимблдон турнири ярим финалига етиб келганди.