Украинада белбоғли кураш бўйича илк Европа чемпионати ўтказилди + ФОТО

Мазкур қўҳна қитъа чемпионатида 100 нафарга яқин полвонлар 65, +65, 90, +90 кг. вазн тоифаларида беллашишди. Мусобақада ҳамюртимиз, халқаро тоифадаги ҳакам Неъматулла Тўйчиев бош ҳакам вазифасида ишлади. Юқори савияда ўтказилган Европа чемпионатида ҳакамлар белбоғли курашда қўлланиладиган атамаларни соф ўзбек тилида талқин этишди.    

Европа чемпионатининг якуний натажаларига кўра, умумжамоа ҳисобида польшалик спортчилар биринчи, мезбонлар икккинчи, литвалик полвонлар эса учинчи ўринни банд этишди. Ҳар бир вазн тоифасида кучли учликдан жой олган полвонлар жаҳон белбоғли кураш ассоциацияси томонидан диплом, медаль ҳамда қимматбаҳо эсдалик совғалари билан тақдирланишди.

Таъкидлаш жоиз, ушбу чемпионат халқаро белбоғли кураш ассоциациясининг кўмаги остида ўтказилди. Мазкур ассоциация жорий йилнинг 27 сентябрь санасида Литва давлатининг Вильнюс шаҳрида расман Европа Иттифоқидан рўйхат ўтказилган. Демак, бу жараён ўз ўзидан миллий белбоғли курашимизнинг ер курраси бўйлаб яна ҳам кенг оммалашаётганидан дарак беради.

Шунингдек, Европа чемпионати доирасида Украинанинг Львов шаҳрида украинча белбоғли кураши бўйича ҳам жаҳон чемпионати бўлиб ўтди. Ушбу мусобақада тўрт нафар полвонларимиз ҳам муносиб иштирок этишди.

Ўн олти давлатдан 200 нафарга яқин атлетлар иштирок этган ушбу жаҳон чемпионатининг классик ва эркин йўналишларида гиламга чиққан +90 кг вазн тоифасидаги юртдошимиз Рустам Умаров (Наманган в.) олтин медаль, 90 кг.да Музаффар Соиббоев (Наманган в.), +90кг.да Латифжон Бадалов (Наманган в.) ҳамда +65 кг.да Саҳобат Шералиева (Фарғона в.)лар  бронза медалларига эга чиқишди.

Европа чемионати ва украинча белбоғли кураш бўйича жаҳон чемпионати ҳамюртларимиз - халқаро белбоғли кураш ассоциацияси раҳбарияти саналган Азиз Ғаниев, Мўмин Муратов ҳамда  Ўзбекистон белбоғли кураш федерацияси раиси Равшан Дастировларнинг бевосита раҳбарлиги остида ўтди.

Илҳом РАҲМОНОВ тайёрлади