Улар Олимпиадага боришади - Анастасия Сердюкова!

Бугунги қаҳрамонимиз бадиий гимнастика бўйича Ўзбекистон терма жамоаси аъзоси Анастасия Сердюкова.

Анастасия Сердюкова – 1997 йилнинг 29 май куни Тошкент шаҳрида дунёга келган. Бадиий гимнастика билан 6 ёшидан шуғулланади. Қиска фурсат ичида айтишга арзигулик ютуқларни қўлга киритган. Жумладан, пойтахтиизда анъанавий тарзда ўтказиб келинадиган “Happy Caravan” мусобақасида бир неча маротаба ғолиб ва совриндорлар сафидан жой олган.

2014 йили нуфузли “Марина Кап” турнири ғолиби бўлган. Айнан шу йили Жанубий Кореянинг Инчеон шаҳрида бўлиб ўтган Осиё ўйинларининг жамоавий баҳсларида Ўзбекистон терма жамоаси таркибида олтин медалга сазовор бўлди. Ўтган йили Москвада ўтган Гран-при туркумига кирувчи халкаро турнирда бронза медали билан тақдирланди. Осиё чемпионатининг жамоавий баҳсларида қитъа чемпионига айланди. Халка ва тасмада бажарилган баҳсларда эса кумуш медал эгаси бўлди.

Бразилиянинг Рио-де-Жанейро шаҳрида XXXI ёзги Олимпия ўйинларининг йўлланмалари ўйналган мусобақада муваффақиятли тарзда иштирок этиб, Рио-2016 ўйинларига лицензияни қўлга киритди. Дунёнинг кўплаб етакчи бадиий гимнастикачилари иштирокида ўтган ушбу нуфузли мусобақанинг шахсий ҳисобдаги баҳсларида истеъдодли спортчимиз кучли бешликдан ўрин эгаллади. Бу билан у тўрт йилликнинг энг йирик спорт мусобақасида қатнашиш ҳуқуқига эга бўлди.

Олимпиадага йўлланма олган барча спортчиларимиз қатори бадиий гимнастикачимиз Анастасия Сердюковага ҳам бўлажак олимпия ўйинларида муваффақиятли иштирокни тилаб қоламиз.