Улар Токиога боришади: Фаолиятини боксдан бошлаган босқон улоқтирувчимиз Суҳроб Хўжаев

Суҳроб Рустамович Хўжаев 1993 йил 21 май куни таваллуд топган. 2010 йилдан терма жамоамиз таркибида иштирок этмоқда. Дастлабки мураббийи Андрей Абдувалиев, ҳозирда Шамил Капкаев қўл остида Олимпия ўйинларига ҳозирлик кўрмоқда.

Суҳроб ёшлигида дастлаб бокс билан шуғулланади, шундан сўнг енгил атлетиканинг аввал диск, кейинчалик босқон улоқтириш йўналишларида ўз омадини синаб кўради.

2012 йил Хўжаев учун омадли бўлади. Дастлаб ёшлар ўртасидаги жаҳон чемпионатида бронза медалини қўлга киритган атлетимиз кейинчалик Лондон-2012 Олимпиадасига йўлланма қўлга киритади. Кейинчалик Рио-2016 Олимпиадасида ҳам мамлакатимиз шарафини ҳимоя қилган.

2014 йил Осиё ўйинларида бешинчи натижани қайд этди. 4 йил ўтиб, Индонезияда кумуш медаль соҳибига айланди. 2019 йил Дохада ўтган Осиё чемпионатида 72.85 метр натижа билан бронза медалига эга чиқди.

8 июнь куни Қозоғистонда ўтган халқаро мусобақада 77.57 (норматив 77.50) метр кўрсаткич билан Токио-2020 нормативини бажарди.