Умид Аҳмаджонов: "Токио—2020 Олимпиадасидаги натижамиз аввалгисидан ҳам яхшироқ бўлади"

Бу ҳақида "Дарё" интернет-нашри хабар қилмоқда.

ЎФФ президенти сифатида фаолият бошлаганимга 1 йил ҳам тўлмаганди. Унинг фаолиятини тубдан ўзгартириш ишлари билан банд бўлиб турганимизда, олдимизга навбатдаги масъулиятли вазифа қўйилди. Энди нафақат футбол, балки мамлакат спортни янги босқичга олиб чиқишимиз керак бўлади.

Мамлакат раҳбариятининг ишончидан бошим кўкка етди. Спорт соҳасини кўтаришга жиддий эътибор берилаётганини 2017 йилнинг ўзида чиқарилган қарорлар ҳам кўрсатиб турибди. Бундан тушуниш мумкинки, соҳамизни ривожлантиришни биринчи навбатда президентимиз Шавкат Миромонович Мирзиёевнинг ўзлари истамоқдалар. Нафақат истак, балки бу йўлда нима керак бўлса, ҳукумат унга замин яратиб беришга тайёр экани ҳар қандай кишига қўшимча мотивация беради.

Тўғри, Риода спортчиларимиз анча муваффақиятли иштирок этишди. Аммо аҳамият берган бўлсангиз, Шавкат Миромонович нафақат боксда, балки спортнинг қолган турларида ҳам катта ўсишга эришишимиз кераклигини таъкидладилар. Ишонаманки, Токио—2020 Олимпиадасидаги натижамиз аввалгисидан ҳам яхшироқ бўлади. Биз бу йўлда жиддий меҳнат қилишга тайёрмиз.

Айтганимдек, ЎФФни қабул қилганимда 1 йил ҳам тўлмаганди. Бироқ МОҚ бутунлай бошқа масала. Бунда спортнинг биргина эмас, барча турлари мужассам. Тез орада Олимпиада ўйинларига лицензия тақдим этувчи мусобақалар бошланади. Қолаверса, олдимизда Осиё Олимпиадаси бизни кутиб турибди. Демак, МОҚда иш қайнайди.

Аммо унутмаслик керакки, биздан шунчаки ишлаш эмас, жон бериб ишлаш, фидойи бўлиш талаб этилади. Демак, имкониятимиздан максимум фойдаланишга ҳаракат қилишимиз шарт. Режага кўра, 25 январь куни ЎФФнинг навбатдан ташқари конференациясини ўтказамиз. Унда ташкилот низомига қўшимча ва ўзгартиришлар киритиш режалаштирилган. Шунингдек, раҳбариятда ҳам ўзгариш бўлади.

Бироқ бу футболдан четлашишим ёки бошланган ишлар якунига етишини билдирмайди. Бошланган ишлар шу йўсинда давом этади ва барчамиз бир ёқадан бош чиқариб, нафақат миллионлар ўйинини, балки спортнинг қолган турларини ҳам кўтаришга ҳаракат қиламиз.