Умиджон Жалолов жаҳон чемпионатидаги иштирокини эрта якунлади, 38 ёшли Магомед Ибрагимовда ҳам мағлубият, аммо унда имконият сақланиб қолди

Бугунги кун доирасида Ўзбекистон терма жамоасининг 6 нафар аъзоси гиламга чиқди. Афсуски, вакилларимизнинг деярли барчаси мағлубиятга учраб, жаҳон чемпионатини жуда эрта якунлашди.

Дастлаб, ўтиш босқичига йўл олган икки вакилимиз — Бекзод Абдураҳмонов (-74 кг) ва Ғуломжон Абдуллаев (-57 кг) рақибларига имкониятни бой бериб қўйишди.

-65 кг вазн тоифасида баҳсларда иштирок этган Умиджон Жалолов эса 1/16 финал доирасида болгариялик Микяй Наимдан устун келди. Нимчорак финал босқичида эса спортчимиз америкалик Ник Ли олдида ожиз қолди. Ник кейинги беллашувида ютқазгани учун Жалоловнинг охирги умиди ҳам сўнди. 

Аёллар кураши бўйича старт олган беллашувларда терма жамоамиз аъзоларидан ўсмирлар олимпиадасининг кумуш медали совриндори Шоҳида Аҳмедова 1/8 финалда германиялик Анастасия Блайвасга ютқазиб қўйди.      

Тажрибали курашчимиз, 38 ёшли Магомед Ибрагимов (-97 кг) эса илк босқичдаёқ Баҳрайн вакили Ахмед Тажудиновга имкониятни бой бериб қўйди. Лекин Тажудинов финалга етиб келгани боис, Ибрагимовда бронза медали ҳамда Париж Олимпиадаси йўлланмаси учун имконият сақланиб қолди. Бунинг учун у аввалига Коста-Рика курашчиси Максвелл Лемарни мағлуб қилиш талаб этилади.