Урганч шаҳрида катта кураш байрами давом этмоқда+ФОТО

Миллатимиз фахри ва ғурури бўлган кураш бугун жаҳон ареналарини забт этмоқда. Шу йилнинг август ойида Индонезиянинг Жакарта шаҳрида ўтадиган Осиё ўйинларида миллий спортимиз бўйича илк бор расмий мусобақалар ўтказилади. 

Ана шундай нуфузли турнир олдидан Хоразм вилоятида ўтаётган мазкур беллашувлар дунёнинг 14 мамлакатидан келган полвонлар учун муҳим синов вазифасини ўтаб бераётгани шубҳасиз. Иккинчи кундирки, Урганч шаҳридаги “Ёшлик” спорт мажмуаси кураш мухлислари билан тўлиб тошмоқда. 

Халқаро турнирнинг очилиш маросимида Хоразм вилояти ҳокими вазифасини бажарувчи Фарҳод Эрманов, Ўзбекистон Кураш федерацияси раисининг биринчи ўринбосари Комилжон Юсупов, Миллий Олимпия қўмитаси бош котиби Жасур Матчоновлар сўзга чиқиб, миллий қадриятимизнинг ажралмас бўлаги бўлган курашнинг халқаро майдондаги обрўсини оширишда бу каби мусобақаларнинг аҳамияти юқорилигини таъкидлаб ўтдилар.  

Очилиш маросимида хоразмлик санъат усталарининг чиқишлари йиғилганларга янада хуш кайфият бахш этди. Паҳлавон Маҳмуд хотирасига бағишланган Ўзбекистон Президенти соврини учун кураш бўйича халқаро турнирнинг биринчи кунида аёллар 52 ва 78, эркаклар эса 66 ва 81 кг вазн тоифаларида ғолиблик учун гиламга чиқдилар.

Таъкидлаш керак, мазкур турнир доирасида Ўзбекистон кураш федерациясининг навбатдан ташқари ҳисобот-сайлов конференцияси бўлиб ўтди. Унда ташкилот фаолияти таҳлил этилиб, Осиё ўйинлари олдидан терма жамоалар фаолиятини янада такомиллаштириш борасида фикрлар алмашилди. 

Шунингдек, федерациянинг янги раиси сайланиб, амалга оширилиши лозим бўлган ишлар белгилаб олинди. Мусобақа давом этмоқда. Турнир ғолиб ва совриндорлари бироздан сўнг аниқ бўлади.