Урганч тумани ёш мерганлари Вилоят кубоги соҳиби + ФОТО

Вилоят техник ва амалий спорт турлари маркази томонидан “Мен ғолиб!” шиори остида ўтказилган мазкур мусобақада воҳанинг шаҳар ва туманларидан ташриф буюрган 18 та жамоанинг 70 нафарга яқин спортчиси ғолиблик йўлида мерганлик маҳоратини намойиш этишди.

Сарҳисобларга кўра, Кубок баҳсларининг тўрт босқичи якуни бўйича пневматик милтиқдан ўқ отиш биринчилигида Боғот  тумани ўқув спорт техника клуби аъзоси Нилуфар Йўлдошева қизлар орасида, Урганч тумани ЎСТК спортчиси Темурбек Абдуллаев ўғил болалар ўртасида шоҳсупанинг энг юқори поғонасига кўтарилишга муваффақ бўлишди.

Пневматик тўппончадан ўқ отиш мусобақасида Урганч тумани вакиллари Рисолат Қурбонова ва Шоҳруххон Юсуфов мос равишда биринчи ўриндан жой олишди.

Шунингдек, Хоразм вилоят техник ва амалий спорт турлари марказидан Диёрбек Очилов, Шовот туманидан Севара Абдуллаева, Шукуржон Одамбоева, Бекзод Комилов, Хива туманидан Лайло Раҳимова, Холбек Оллаёров, Боғот туманидан Лайло Султонова, Қўшкўпир туманидан Шаҳзод Сапарбоев ва “Карвон” ўқув спорт техника клубидан Оғабек Маҳмудов совриндор бўлишди.

Жорий йилги Хоразм вилояти кубогининг ғолиб ва совриндорларини вилоят техник ва амалий спорт турлари маркази директори Одилбек Ибрагимов қутлаб, барчасини медаль, диплом ва совғалар билан тақдирлади.

Умумжамоа ҳисобида эса 2021 йилги Хоразм вилояти кубоги Урганч тумани ЎСТК мерганларига топширилди.

Икром ХУДОЙБЕРГАНОВ, Хива туманидан