Урганчда дуатлон бўйича ғолиблар аниқланди + ФОТО

Ўзбекистон Республикаси мудофаасига кўмаклашувчи “Ватанпарвар” ташкилоти Хоразм вилояти кенгаши тасарруфидаги вилоят техник ва амалий спорт турлари маркази томонидан ёшларни спортнинг техник ва амалий турларига бўлган қизиқишини ошириш, уларни соғлом руҳда вояга етказиш мақсадида белгиланган режа асосида спорт мусобақалари ўтказиб келинаётир.

Хусусан, Урганч туманининг Чолиш қўрғонида жойлашган ўқув-машқ майдонида дуатлон бўйича ташкил этилган Хоразм вилояти кубогининг биринчи босқичи ҳам ана шулар сирасига киради.

“Янги Ўзбекистонда эркин ва фаровон яшайлик!” шиори остида уюштирилган мазкур мусобақада воҳанинг шаҳар ва туманларидан келган 60 нафарга яқин ўғил ва қизлар ўзаро куч синашди.

Якуний сарҳисобларга кўра, катта ёшли, яъни 2001-2003 йилларда туғилган дуатлончилар биринчилигида Гурлан тумани ўқув спорт техника клуби аъзоси Зумрад Ўразметова қизлар орасида, Урганч автомобиль спорт техника мактаби спортчиси Норбек Жуманиёзов ўғиллар ўртасида биринчи ўринни эгаллади.

Кичик, 2004-2006 йилларда туғилган ўсмирлар мусобақасида шовотлик Зуҳра Рўзимова ва Қўшкўпир туманидаги “Ўртаёп” ўқув-спорт техника клуби вакили Отабек Омонбоев ғолиб бўлди.

Умумжамоа ҳисобида Гурлан тумани жамоаси дуатлончилари шоҳсупанинг биринчи поғонасига кўтарилди.

Икром ХУДОЙБЕРГАНОВ, Хоразм вилоятидан