Urmia Open. Каратэчиларимиз Эрондаги мусобақада 3 та медаль қўлга киритишди ФОТОГАЛЕРЕЯ

Ёшлар ва катталар ўртасида ўтказилган ушбу халқаро мусобақада Азизбек Бўриев мураббийлигидаги ўзбекистонлик каратэчилар ҳам муваффақиятли иштирок этишди. Ҳамюртларимиз Урмиядаги турнирда жами 3 та медални қўлга киритишди.

16-17 ёшлилар ўртасидаги мусобақанинг -55 кг вазн тоифасидаги беллашувларида иштирок этган Улуғбек Алибоев 6 та жангда рақибларидан устун келиб, финалга йўл олди. Олтин медаль учун кечган муросасиз баҳсда эса омад мезбон спортчига кулиб боқди.

-68 кг вазн тоифасида юртимиз шарафини ҳимоя қилган Шоҳруҳ Турсунмахамматов ҳам 5 та беллашувни ўз фойдасига ҳал қилиб, финалга йўл олди. Афсуски, бу сафар ҳам эронлик каратэчи финалда кучли эканини исботлади. 

-76 кг вазнда қатнашган Қувонч Муҳаммадиев финал йўлланмаси учун кечган учрашувда ютқазиб қўйди. Лекин 3-ўрин учун кечган баҳсда рақибини мағлуб этиб, мусобақанинг бронза медалига эга чиқди. 

Тан олиш керак, Эрон нафақат Марказий Осиёда, балки жаҳонда ҳам кучлилар қаторига кирадиган давлатлардан бири ҳисобланади. Шу боис, бу каби турнирларда иштирок этиш ўсиб келаётган ёш спортчиларимиз учун яхшигина тажриба мактаби вазифасини ўтаб беради.