US Open 2026. Камилла Раҳимова 1/16 финалда. Эндиги рақиба дунёнинг 1-ракеткаси!

Ўзбекистоннинг иккинчи ракеткаси Камилла Раҳимова 1/64 финал учрашувида турнирда 27-рақам остида таснифланган чехиялик Барбора Крейчиковани 7/6(4), 6/2 ҳисобида мағлубиятга учратган эди. Бугун ўтказилган 1/32 финал учрашувида эса яна бир ажойиб ғалаба қўлга киритилди. 

Олтмиш беш дақиқа давом этган баҳсда Раҳимова испаниялик Оксана Селехметьевани ортиқча қийинчиликсиз таслим этди - 6/3, 6/0. Ҳамюртимиз битта эйс зарбасини амалга оширди. Қўшхатога йўл қўймади. Оксанада битта қўшхато бўлди, лекин эйс зарбасини ижро эта олмади. Теннисчиларнинг ўзаро олтинчи учрашувига келиб Раҳимова мувозанатни тиклади - 3:3. 

Таққослаш учун, Камилла Раҳимова айни пайтда WTA рейтингида 92, Оксана Селехметьева эса 93-ўринни эгаллаб турибди. Камилланинг 1/16 финалдаги рақибаси дунёнинг биринчи ракеткаси Арина Соболенко бўлади. Беларуслик теннис маликаси иккинчи даврада рейтингнинг 160-поғонасида бораётган россиялик Полина Ятченкони 6/1, 6/1 ҳисобида доғда қолдирди. 

Камилла Раҳимова - Арина Соболенко учрашуви эртага, 4 сентябрь куни бизнинг вақт билан соат 20:00да бошланади. Бу теннисчиларнинг ўзаро ўтказадиган тўртинчи учрашуви бўлади. Бугунгача ўтган уччала баҳсда ҳам Собленконинг қўли баланд келган.