US Open 2026. Камилла Раҳимова илк даврада дунёнинг 29-ракеткасини таслим этди

Мусобақанинг асосий тўрида икки вакиламизнинг ҳам иштирок этиши ҳақида хабар берган эдик. Ўзбекистоннинг биринчи ракеткаси Камилла Раҳимова 1/64 финал учрашувида шов-шувли ғалабага эришди. Ҳамюртимиз илк босқичда чехиялик Барбора Крейчиковага қарши кортга чиқди. 

Бир соату 55 дақиқа давом этган баҳсда Раҳимова дунёнинг собиқ биринчи ракеткасини 7/6(4), 6/2 ҳисобида мағлубиятга учратди. Барбора турнирда 27-рақам остида таснифланган эди. Эйслар бўйича чехиялик теннис маликаси катта устунликка эришди - 8 га 1. Иккала теннисчи бир хилда - 8 тадан қўшхатога йўл қўйди.

Бу теннисчиларнинг ўзаро иккинчи учрашуви эди - 1:1. 2021 йилда айнан US Open турнири доирасида ўтган илк баҳсда Крейчикова зафар қучганди. Раҳимова айни пайтда WTA рейтингида 92, Крейчикова эса 29-ўринни эгаллаб турибди. Камилланинг 1/32 финалдаги рақибаси бугун япониялик Аои Ито (рейтингдаги ўрни 373) ҳамда испаниялик Оксана Селехметьева (93) ўртасидаги учрашувда аниқланади.