US Open теннис тарихида рекорд даражадаги соврин жамғармасини эълон қилди

Бу теннис тарихидаги энг юқори соврин жамғармасидир.

US Open-2026 мусобақаси иштирокчиларига жами $108 миллион миқдорида маблағ тўланади. Бу ҳақда турнирнинг расмий сайти хабар берди. Мазкур кўрсаткич 2025 йилда АҚШ Очиқ чемпионатида қайд этилган аввалги рекорддан 20 фоизга юқори. Ўшанда теннисчиларга $90 миллион тўланган эди. 2024 йил билан таққослаганда эса соврин жамғармаси 44 фоизга ошган.

2026 йилда эркаклар ва аёллар ўртасидаги яккалик баҳслари ғолиблари ҳар бири $5,5 миллиондан ишлаб олади. Бу 2025 йилда чемпион бўлган Карлос Алькарас ва Арина Соболенко олган маблағдан $500 мингга кўп. Бу — «Катта дубулға» турнирлари тарихида яккалик баҳслари ғолибига берилган энг катта соврин пули ҳисобланади.

Финалчиларнинг ҳар бири $2,8 миллион, ярим финалчилар $1,45 миллион, чорак финалчилар эса $780 мингдан олади. Жуфтлик баҳслари чемпионлари эса ўзаро $1 миллиондан бўлишиб олади.

Мусобақада ўзбекистонлик ракетка усталари Камилла Раҳимова ҳамда Мария Тимофеева иштирок этади.