Усикнинг жамоаси Тайсон Фьюрининг чақирувига жавоб қайтарди

Александр Усикнинг жамоаси Фьюрининг бу чақирувини жиддий қабул қилмаяпти. Бу ҳақда украиналик боксчининг спорт директори Сергей Лапин маълум қилди.

"Усик Тайсон учун захира варианти эмас. Александр ҳар доим катта чақирувларга очиқ, аммо жиддий ниятлар матбуотдаги баёнотлар билан эмас, балки аниқ таклифлар билан тасдиқланиши керак", – дея Лапиннинг сўзларини келтирмоқда Sky Sports нашри.

"Лўлилар қироли" яқинда омма олдида Усикка мурожаат қилиб, ноябрь ойида трилогия ўтказишни таклиф қилганди. 2024 йилда украиналик боксчи британиялик рақибини икки марта ҳакамлар қарори билан мағлуб этган: биринчи жангда оғир вазн тоифасида мутлақ жаҳон чемпиони бўлган, иккинчисида эса ўз камарларини ҳимоя қилган.

Жорий йилнинг ёзида Александр Усик ўзига тегишли бўлган барча камарлардан воз кечди ва ҳозирда америкалик Деонтей Уайлдер билан музокаралар олиб бормоқда. Улар келаси йилнинг март ойида рингда тўқнашишни режалаштиришган.