"Uzchess Cup". Абдусатторовда кетма-кет иккинчи ғалаба, икки Нодирбек қўшҳоким, Суяров ҳамон ютқазмаяпти (6-турнинг барча маълумотлари)

Мукофот жамғармаси 166 000 АҚШ долларини ташкил этувчи мусобақада 6-тур учрашувлари ортда қолди. Турнирнинг "Masters" ва "Futures" гуруҳларида ҳамон ўзбекистонлик шахматчилар якка пешқадам бўлиб туришибди. 

Истеъдодли гроссмейстеримиз Нодирбек Якуббоев (2634) бу сафар ҳам дурангга рози бўлди. Қора доналарда сербиялик Алексей Саранага қарши баҳс олиб борган Якуббоев муроса йўлини танлади. Жавоҳир Синдаров оқ доналарда озарбайжонлик таниқли гроссмейстер Шахрияр Мамедьяров (2734) билан дуранг ўйнади. 

Нодирбек Абдусатторов эса асосий рақибларининг очко йўқотишидан унумли фойдаланиб қолди. У қора доналарда ўйнашига қарамай, хитойлик Ю Янг Йини чиройли тарзда мағлубиятга учратди. Худди 5-турда бўлгани сингари бу сафар ҳам "Masters" гуруҳида биргина Нодирбек Абдусатторов ғалаба қозонди. Қолган барча партияларда томонлар дурангга имзо чекишди. 

Еттинчи тур олдидан "Masters" гуруҳида қўшҳокимлик юзага келди. Нодирбек Якуббоев ва Нодирбек Абдусатторов 4 очкодан жамғариб, турнир жадвалида пешқадамлик қилишяпти. Жавоҳир Синдаров 3,5 очко билан кучли учликка якун ясаган. Ю Янг Йи, Ричард Раппорд ва Алексей Сарана ҳисобида 3 тадан очко бор. 

"Challengers" гуруҳининг 6-турида ҳам битта ғалаба қайд этилди. Александр Предке туркиялик Мустафа Йилмазни таслим этди. Қолган барча партияларда дуранг кузатилди. Гуруҳ пешқадами, сербиялик Александар Инджич бу турда оқ доналарда германиялик Александр Донченко билан очколарни бўлишиб олди. Жаҳонгир Воҳидов ҳиндистонлик Абҳижит Гупта, Шамсиддин Воҳидов эса Максим Матлаков билан дурангга рози бўлди. Шамсиддин 4 очко билан 2-ўринни эгаллаб турибди. Пешқадам Инджичда 4,5, 3-ўриндаги Предкеда 3,5 очко бор. 

"Futures" гуруҳининг 6-турида кетма-кет тўртта ғалабадан сўнг Муҳаммадзоҳид Суяров (2430) Виталий Сивук билан дуранг ўйнади. Шунга қарамай, ёш шахматчимиз 5 очко билан якка пешқадамлигини давом эттирмоқда. Ҳамюртларимиз Муҳиддин Мадаминов ва Саидакбар Сайдалиев 4 очкодан жамғариб, кучли учликни якунлаб туришибди. Тўртинчи поғонадаги эронлик Бардия Данешварда ҳам 4 очко бор. Бу турда Мадаминов ўзбек дербисида Ҳумоюн Бегмуратовдан устун келди.