"Uzchess Cup". Бугун 6-турда шахматчиларимиз кимларга қарши дона суришади? (Жуфтликлар)

Мукофот жамғармаси 166 000 АҚШ долларини ташкил этувчи мусобақада бугун 6-тур партиялари ўйналади. Бугунги учрашувлар ҳам соат 15:00да бошланади. "Masters" гуруҳида пешқадамлик қилаётган Нодирбек Якуббоев (2634) қора доналарда сербиялик Алексей Сарана (2712)га қарши баҳс олиб боради. 

Ўтган турда ғалаба қозонган Нодирбек Абдусатторов (2766) хитойлик Ю Янг Йи (2715) билан ҳисоб-китоб қилади. Жавоҳир Синдаров (2668) бу турни оқ доналарда озарбайжонлик таниқли гроссмейстер Шахрияр Мамедьяров (2734) билан муносабатларига ойдинлик киритиб олади.   

"Uzchess Cup". "Masters" гуруҳи. 6-тур жуфтликлари

Алексей Сарана (Сербия, 2712) - Нодирбек Якуббоев (Ўзбекистон, 2634)

Жавоҳир Синдаров (Ўзбекистон, 2668) - Шахрияр Мамедьяров (Озарбайжон, 2734) 

Александр Гришук (FIDE, 2719) - Парҳам Мақсудлу (Эрон, 2733) 

Ю Янг Йи (Хитой, 2715) - Нодирбек Абдусатторов (Ўзбекистон, 2766) 

Ричард Раппорт (Руминия, 2715) - Видит Сантош Гужратҳи (Ҳиндистон, 2721) 

"Challengers" гуруҳининг 6-турида турнир жадвалида иккинчи ўринни эгаллаб турган Шамсиддин Воҳидов (2624) қора доналарда Максим Матлаков (FIDE, 2657) билан тўқнаш келади. Яна бир ҳамюртимиз Жаҳонгир Воҳидов (2580) оқ доналарда Абҳижит Гупта (Ҳиндистон, 2589) билан ўйнайди. Гуруҳ пешқадами, сербиялик Александар Инджич (2602) эса бу турда оқ доналарда германиялик Александр Донченкога қарши баҳс олиб боради. 

"Futures" гуруҳида кетма-кет 4 та ғалабага эришиб, 4,5 очко билан якка пешқадам бўлиб турган истеъдодли шахматчимиз Муҳаммадзоҳид Суяров (2430) 6-турда украиналик Виталий Сивук (2569) билан учрашади. Кучли учликдан жой олган Муҳиддин Мадаминов (2517) яна бир ҳамюртимиз Ҳумоюн Бегмуратов (2429) билан шахмат доскаси атрофида юзлашади. Саидакбар Сайдалиев эса (2448) эронлик Бардия Данешвар (2611) билан қора доналарда ўйнайди.