"Uzchess Cup". Бугун 7-турда иккита ўзбек дербисига гувоҳ бўламиз (барча жуфтликлар)

Мукофот жамғармаси 166 000 АҚШ долларини ташкил этувчи мусобақада бугун 7-тур партиялари ўйналади. Бугунги учрашувлар ҳам соат 15:00да бошланади. "Masters" гуруҳида қўшимча кўрсаткичларга кўра пешқадамлик қилаётган Нодирбек Абдусатторов (2766) бугун оқ доналарда руминиялик Ричард Раппорт (2715)га қарши баҳс олиб боради. Нодирбек кетма-кет икки ғалабадан сўнг 4 очко билан 1-ўринга кўтарилиб олган. 

Нодирбек Якуббоев (2634) ҳам 4 очкога эга ва у қўшимча кўрсаткичларга кўра 2-ўринни банд этган. Бугун у 7-турда ўзига хос ўзбек дербисида Жавоҳир Синдаров (2688) билан ҳисоб-китоб қилади. Нодирбек оқ доналарда ўйнайди. Абдусатторовни мағлуб этган Жавоҳир бугун иккинчи Нодирбекни ҳам таслим эта оладими? 

"Uzchess Cup". "Masters" гуруҳи. 7-тур жуфтликлари

Видит Сантош Гужратҳи (Ҳиндистон, 2721) - Алексей Сарана (Сербия, 2712) 

Нодирбек Абдусатторов (Ўзбекистон, 2766) - Ричард Раппорт (Руминия, 2715) 

Парҳам Мақсудлу (Эрон, 2733) - Ю Янг Йи (Хитой, 2715) 

Шахрияр Мамедьяров (Озарбайжон, 2734) - Александр Гришук (FIDE, 2719) 

Нодирбек Якуббоев (Ўзбекистон, 2634) - Жавоҳир Синдаров (Ўзбекистон, 2668) 

"Challengers" гуруҳининг 7-турида турнир жадвалида иккинчи ўринни эгаллаб турган Шамсиддин Воҳидов (2624) оқ доналарда гуруҳ пешқадами Александр Инджич (Сербия, 2602) билан муносабатига ойдинлик киритиб олади. Яна бир ҳамюртимиз Жаҳонгир Воҳидов (2580) қора доналарда Александр Донченко (Германия, 2639)га қарши баҳс олиб боради. 

"Futures" гуруҳида мағлубият нималигини билмай келаётган ва 5 очко билан якка пешқадам бўлиб турган истеъдодли шахматчимиз Муҳаммадзоҳид Суяров (2430) 7-турда озарбайжонлик Вугар Расулов (2557) билан қора доналарда ўйнайди. Қизиғи, иккинчи ва учинчи ўринларни эгаллаб турган ҳамюртларимиз Муҳиддин Мадаминов (2517) ва Саидакбар Сайдалиев (2448) бу турда ўзаро тўқнаш келишади. Саидакбар оқ доналарда ҳаракат қилади.