UzChess Cup III. Мадаминов Номзодлар турнирининг икки карра ғолибини таслим этди. Нодирбеклар баҳсида қандай натижа кузатилди?

Учинчи бор ташкил этилаётган UzChess Cup III мусобақаси “Masters”, “Challengers” ва “Futures” гуруҳларида ўтказилмоқда. Бош соврин учун дунёнинг кўзга кўринган гроссмейстерлари баҳсларга киришди. Тўққиз турдан иборат классик шахмат мусобақасининг 1-туридаёқ шов-шувли натижа кузатилди. 

Муҳиддин Мадаминов оқ доналарда россиялик таниқли шахматчи, Номзодлар турнирининг икки карра ғолиби Ян Непомняшийни мағлубиятга учратди. Нодирбек Абдусатторов қора доналарда яна бир гроссмейстеримиз Нодирбек Якуббоев билан муросага келди. Якуббоев учрашув давомида қўлга киритган устунлигидан унумли фойдалана олмади. 

Шамсиддин Воҳидов оқ доналарда ҳиндистонлик Аржун Эргаиси билан дурангга имзо чекди. Озарбайжонлик Шахрияр Мамедьяров ҳиндистонлик Видит Гужратҳидан устун келди. Грециялик Николас Теодору америкалик Ҳанс Мок Ниеманн устидан ғалабага эришди.  

Биринчи турдан сўнг Николас Теодору, Муҳиддин Мадаминов ва Шахрияр Мамедьяров турнир жадвалида пешқадамликни қўлга олди. Бугун 2-турда Нодирбек Абдусатторов оқ доналарда Шахрияр Мамедьяровга, Муҳиддин Мамадаминов оқ доналарда Николас Теодоруга қарши баҳс олиб боради. Нодирбек Якуббоев қора доналарда Аржун Эргаиси билан ҳисоб-китоб қилса, Шамсиддин Воҳидовни Ҳанс Ниеманнга қарши баҳс кутмоқда. 

Маълумот учун, "Masters" турнири чемпиони 20 000, “Challengers” гуруҳи ғолиби 6 000, “Futures”да бош совринга эга чиққан шахматчи эса 4 000 АҚШ доллари миқдорида мукофот пулини қўлга киритади. "Masters" турнирида иккинчи ўрин эгаси 15 000, совринли учинчи поғонадан жой олган шахматчи 10 000 доллар билан тақдирланади.