UzChess Cup III. Мадаминов яна ғалаба қозонди. Иккинчи турда дуранг қайд этилмади

Учинчи бор ташкил этилаётган UzChess Cup III мусобақаси “Masters”, “Challengers” ва “Futures” гуруҳларида ўтказилмоқда. Бош соврин учун дунёнинг кўзга кўринган гроссмейстерлари баҳс олиб боряпти. Тўққиз турдан иборат классик шахмат мусобақасининг 2-турида ҳам Муҳиддин Мадаминов шов-шувли юришини давом эттирди. Бу сафар у рейтингда ўзидан юқорида бораётган грециялик гроссмейстер Николас Теодоруни тасоим этди.  

Нодирбек Абдусатторов биринчи турдаги дурангдан кейин 2-турда озарбайжонлик таниқли шахматчи, блиц бўйича жаҳон чемпиони, бир пайтлар дунё рейтингида иккинчи ўринни эгаллаган Шахрияр Мамедьяровни мағлубиятга учратди. Абдусатторов билан муросага келган Нодирбек Якуббоев 2-турда ҳиндистонлик Аржун Эргаисига ютқазиб қўйди. 

Шамсиддин Воҳидов ҳам бу турда мағлубият аламини тотиб кўрди. У америкалик Ҳанс Мок Ниеманндан енгилди. Биринчи турда Мадаминовга имкониятни бой берган Номзодлар турнирининг икки карра ғолиби россиялик Ян Непомняший ҳиндистонлик Видитни мағлуб этди. 

Эътиборлиси, 2-турда дуранг натижа қайд этилмади. Бу шахматда камдан-кам учрайдиган ҳолат. Иккинчи турдан кейин Муҳиддин Мадаминов юз фоизлик натижа билан турнир жадвалида якка пешқадам бўлиб олди. Нодирбек Абдусатторов 1,5 очко билан қўшимча кўрсаткичларга кўра 2-ўринни эгаллаб турибди. Учинчи поғонадаги Аржун Эргаиси ҳисобида ҳам 1,5 очко бор. Николас Теодору 1 очко билан 4-поғонадан жой олган. 

Бугун 3-турда Муҳиддин Мадаминов қора доналарда яна бир ҳамюртимиз Шамсиддин Воҳидовга қарши баҳс олиб боради. Нодирбек Абдусатторов қора доналарда Видит Гужратҳи билан ҳисоб-китоб қилади. Нодирбек Якубббоев оқ доналарда Ҳанс Ниеманн билан тўқнаш келади. 

Маълумот учун, "Masters" турнири чемпиони 20 000, “Challengers” гуруҳи ғолиби 6 000, “Futures”да бош совринга эга чиққан шахматчи эса 4 000 АҚШ доллари миқдорида мукофот пулини қўлга киритади. "Masters" турнирида иккинчи ўрин эгаси 15 000, совринли учинчи поғонадан жой олган шахматчи 10 000 доллар билан тақдирланади.