UzChess Cup III. Қойил! Мадаминов Мамедьяровни, Воҳидов Непомняшийни мағлуб этди. Шамсиддин якка пешқадам!

Учинчи бор ташкил этилаётган UzChess Cup III мусобақаси “Masters”, “Challengers” ва “Futures” гуруҳларида ўтказилмоқда. Бош соврин учун дунёнинг кўзга кўринган гроссмейстерлари баҳс олиб боряпти. 

Тўққиз турдан иборат классик шахмат мусобақасининг дастлабки икки турида номдор рақибларини мағлуб этиб, катта шов-шув кўтарган Муҳиддин Мадаминов кетма-кет иккита мағлубият қабул қилиб олганди. Бешинчи турда Синдаровнинг секунданти бўлган Муҳиддин яна муҳим ва шов-шувли ғалабани тантана қилди. У қора доналарда ўйнаганига қарамай, озарбайжонлик таниқли гроссмейстер Шахрияр Мамедьяровни таслим этди. 

Яна бир гроссмейтеримиз Шамсиддин Воҳидов ҳам сенсация муаллифига айланди. У блиц бўйича жаҳон чемпиони, россиялик машҳур шахматчи Ян Непомняшийни мағлуб этишни уддалади. Шамсиддин ўтган йили ҳам Яндан устун келган эди.   

Бешинчи турнинг қолган учта партиясида кучлар тенг келди. Нодирбек Абдусатторов ҳиндистонлик Аржун Эригаиси, Нодирбек Якуббоев грециялик Николас Теодору, ҳиндистонлик яна бир гроссмейстер Видит Сантош Гужратҳи америкалик Ҳанс Мок Ниеманн билан муросага келди. 

Бешинчи турдан кейин Шамсиддин Воҳидов 3,5 очко билан турнир жадвалида якка пешқадамга айланиб олди. Аржун Эргаиси, Нодирбек Абдусатторов ва Муҳиддин Мадаминов ҳисобида 3 очкодан бор. Нодирбек Якуббоев ва Ҳанс Ниеманн 2,5 очкодан жамғариб, мос равишда бешинчи ҳамда олтинчи ўринни банд этган. Николас Теодору, Ян Непомняший ва Шахрияр Мамедьяров 2 очко билан кейинги ўринларда бормоқда. Видит Сантош 1,5 очко жамғарган ҳолда сўнгги ўринда қолди. 

Бугун 6-турда Шамсиддин Воҳидов оқ доналарда Нодирбек Якуббоевга, Нодирбек Абдусатторов қора доналарда Ҳанс Ниеманнга, Муҳиддин Мадаминов оқ доналарда Видит Сантошга қарши баҳс олиб боради. Олтинчи турда, шунингдек, Ян Непомняший - Аржун Эргаиси ҳамда Николас Теодору - Шахрияр Мамедьяров учрашувлари ҳам ўтказилади.