Валентина Шевченко бекор бўлган даъвогарлар жангидан кейин ўзига рақиб танлади

Аммо оқшомнинг асосий жанги ҳисобланган Эрин Блэнчфилд ва Мэйси Барбер ўртасидаги тўқнашув ўтказилмади. Бунга Барбернинг соғлиғидаги муаммолар сабаб бўлган. Бу даъвогарлик мақомидаги жанг эди. Шахсан Валентина Шевченконинг ўзи ҳам бугунги турнирга ташриф буюрганди. 

Энди қирғизистонлик чемпионнинг эҳтимолий рақиблари икки нафар қолмоқда – Вейли Чжан ва Наталия Сильва.

"Рақибим Эрин ёки Мэйси бўлиши керак эди. Афсус, жанг ўтказилмади. Бу ҳолатда Наталия Сильва ёки Вейли Чжанни танлашимга тўғри келади. Наталия яхши жанг кўрсата олди, Вейли эса биринчи ўта енгил вазн чемпиони. Айнан у кўпроқ мен билан жанг қилишга ҳақли", – деди Шевченко турнирдан кейин берган интервьюсида. 

Маълумот учун, уч ҳафта олдин Валентина Шевченко франциялик Манон Фиорони очколар ҳисобига кўра мағлуб этиб, чемпионлик камарини муваффақиятли ҳимоя қилганди. Вейли Чжан эса шу йилнинг февраль ойида Татьяна Суаресни очколар бўйича ютиб, титулини ўзида сақлаб қолган эди.