“Ватанпарвар” ташкилоти спортчиси Россияда ғолибликни қўлга киритди

Мазкур нуфузли спорт мусобақасида 9 та давлат, жумладан, Россия, Ўзбекистон, Озарбайжон, Беларус, Қирғизистон, Қозоғистон, Тожикистон, Молдова ва Арманистондан 14 ёшдан 23 ёшгача бўлган тажрибали спортчилар беллашмоқда.

Қувонарлиси, ушбу мусобақанинг пневматик қуролдан ўқ отиш йўналишида Ўзбекистон терма жамоаси аъзоси – Ўзбекистон Республикаси мудофаасига кўмаклашувчи “Ватанпарвар” ташкилоти Наманган вилояти кенгашининг ўқ отиш спорти секцияси аъзоси Муҳаммад Камалов фахрли 1-ўринни эгаллаб, олтин медалга сазовор бўлди.

Айтиш жоиз, бу “Ватанпарвар” ташкилоти спортчисининг Ўзбекистон Республикаси давлат мустақиллигининг 30 йиллигига муносиб совғаси бўлди.

Наманганлик Муҳаммад Камалов 2002 йилда туғилган бўлиб, 6 йилдан буён, “Ватанпарвар” ташкилоти Наманган вилояти кенгашининг ўқ отиш спорти секциясида Муҳаббат Кондакова ва Вадим Кондаков мураббийлиги остида шуғулланиб келмоқда. Ёш спортчи бир неча маротаба республика ва халқаро мусобақаларда ғолибликни қўлга киритиб, 2020 йилда имтиёз асосида Наманган Муҳандислик-қурилиш институтига ўқишга қабул қилинган.

Эслатиб ўтамиз, Қозон шаҳрида ўтаётган биринчи МДҲ давлатлари ўйинлари 11 сентябрь куни якунига етади. Ҳозирда Ўзбекистон спортчилари Россия терма жамоасидан кейин иккинчи ўринни эгаллаб турибди.

Ўзбекистон Республикаси мудофаасига кўмаклашувчи “Ватанпарвар” ташкилоти Матбуот хизмати