Вазир сув спорти турлари бўйича Республика олий спорт маҳорати мактабида бўлди

Спортнинг сузиш турлари бўйича нуфузли халқаро мусобақаларга тайёргарлик жараёнлари билан яқиндан танишиш, амалий ёрдам ва тавсиялар бериш мақсадида Спортни ривожлантириш вазири Адҳам Икрамов сув спорти турлари бўйича Республика олий спорт маҳорати мактабида бўлди.

Дастлаб вазир спортнинг регби тури бўйича машғулотлар олиб бориладиган Ўзбекистон миллий университети ҳудудида жойлашган стадион билан танишди. Шу билан бирга Спортни ривожлантириш вазирлиги тасарруфидаги яқинда капитал таъмирдан чиқарилган сув спорти саройи ҳам кўздан кечирилди.

Мазкур сув ҳавзасида мусобақаларга тайёргарлик кўраётган ёшларга яратилган шарт-шароитлар ўрганилиб, спортчилар билан самимий суҳбат ўтказилди.

Қайд этиш жоиз, сув спорти турлари бўйича Республика олий спорт маҳорати мактабида 57 нафар мураббий фаолият олиб боришади. Шунингдек, мазкур таълим масканида Ўзбекистон миллий терма жамоасига аъзо бўлган жами 314 нафар спортчи шуғулланиб келмоқда. 

Ташриф якунида Спортни ривожлантириш вазири мактаб раҳбарияти ҳамда ишчи ходимлар билан учрашиб, иш самарадорлигини ошириш юзасидан тегишли кўрсатмалар берди.