Вазирликда Тошкент Гран-присига тайёгарлик муҳокама қилинди

Ўзбекистон жисмоний тарбия ва спорт вазирлигида ушбу нуфузли мусобақага тайёргарлик, катта спорт тадбирини юқори савияда ташкил этиш ва ўтказишга бағишланган ташкилий қўмита йиғилиши бўлиб ўтди. Тадбирни Ўзбекистон жисмоний тарбия ва спорт вазирининг биринчи ўринбосари Ойбек Касимов олиб борди. 

“Бир неча йилдан бери анъанавий тарзда ўтказиб келинаётган Тошкент Гран-присига илк бор муҳташам, кўп тармоқли, жаҳон талабларига тўлиқ жавоб берувчи “Ҳумо” арена мезбонлик қилади. Пойтахтимизга келган Халқаро дзюдо федерацияси (IJF) мутасаддилари ушбу аренага юқори баҳо беришди. Ўз ўрнида биз халқаро экспертлар эътирофига сазовор бўлган “Ҳумо” аренадаги катта масштабдаги илк мусобақани юқори савияда ўтказишимиз керак”, - деди О.Касимов. 

Вазирнинг биринчи ўринбосари мусобақага кўрилган тайёргарлик ва уни ўтказиш бўйича олиб борилаётган ишлар билан яқиндан танишди. Бу борада ўз кўрсатмаларини берди. 

Йиғилишда иштирок этган Ўзбекистон дзюдо федерацияси раҳбарияти 50 дан ортиқ давлатдан келаётган спорт делегациялари, мартабали меҳмонларни кутиб олиш, меҳмонхоналарга жойлаштириш, мусобақа доирасида маданий тадбирларни ташкил этиш, пойтахтимизнинг диққатга сазовор масканларига сайёҳатлар уюштириш бўйича барча ишлар шай ҳолатга келтириб қўйилганлиги бўйича ахборот беришди. 

Эслатиб ўтамиз, дзюдо бўйича Тошкент Гран-приси илк бор 2013 йилда бўлиб ўтган эди. Шу кунгача ўтказилган барча мусобақага “Ўзбекистон” спорт саройи мезбонлик қилган.