Велоспорт. Эркаклар ўртасида олтин медаль қозоғистонлик спортчида

Ушбу гурух пойгаларида финиш Тошкент вилоятининг Билдирсой дам олиш маскани этиб белгиланган бўлиб, мазкур мусобақада спортчилар 2020 йил Токио шаҳрида бўлиб ўтадиган ХХХII ёзги Олимпия ўйинларига йўлланмани қўлга киритиш учун беллашдилар. Men Elit йўналишидаги гурух пойгаларидаЎзбекистон шарафини 4 нафар спортчиз Муроджон Холмуродов, Сергей Медведев, Акромжон Суннатов, Улуғбек Саидов ҳимоя қилди. Муросасиз кечган пойгада Қозоғистон, Хитой, Хитой Тайпейи миллий терма жамоалари етакчилик қилдилар. Мусобақа натижалари бўйича 166.6 км масофани 4 соату 3 дақиқаю 21 сонияда босиб ўтган қозоғистонлик Евгений Гидич 1-ўринни эгаллади. Хитойлик Хианжинг Лю 2-ўринни, Хитой Таипейилик Каи Чун Фенг 3-ўринни банд этди. Қозоғистонлик Евгений Гидич олтин медал билан бирга ХХХII ёзги Олимпия ўйинларига йўлланмани ҳам қўлга киритди.

Шу билан 22 апрелдан 28 апрелгача Ўзбекистон тарихида илк маротаба ўтказилган велошоссе бўйича Осиё чемпионати ўз якунига етди. Мазкур Осиё чемпионатида 40 га яқин давлатдан 500 нафардан ортиқ спортчилар иштирок этдилар. Чемпионат катталар, ўсмирлар, параолимпиячилар ва мастерлар иштирокида бўлиб ўтди ҳамда спортчилар жамоавий пойгалар, яккалик пойгалари ва гурух пойгаларида беллашдилар. Осиё чемпионатида Ўзбекистон миллий терма жамоаси 2 та олтин, 3 та бронза, 2 та кумуш медални қўлга киритиб, умумий хисобда 7 та медал жамғардилар. 

Осиё чемпионатининг энг ёрқин лахзалари 27 апрель куни асосий мусобақалар бўлган Women Elit йўналишида гурух пойгалари бўлди десак хато бўлмайди. Мазкур мусобақада 112.8 км масофа бўйича бўлиб ўтди ҳамда ушбу масофани Ўзбекистон аёллар миллий терма жамоаси аъзоси Ольга Забелинская 3 соату 9 дақиқаю 5 сонияда босиб ўтиб, 2020 йил Токио шаҳрида бўлиб ўтадиган ХХХII ёзги Олимпия ўйинларига йўлланмани қўлга киритди. Алохида таъкидлаш жоизки 27-28 апрелдаги асосий мусобақалар “Евроспорт” канали томонидан тўғридан тўғри намойиш этилди. 

Шу билан бир қаторда Осиё чемпионати доирасида Халқаро Велосипедчилар Иттифоқи (UCI) президенти Давид Лапарте, Осиё Велоспорт Конфедерацияси (АСС) президенти Осама Аҳмад Абдуллоҳ ал-Шафар, бир қатор хорижий делегация аъзолари иштирокида Халқаро Велосипедчилар Иттифоқи (UCI) томонидан антидопинг семинар ҳамда Осиё Велоспорт конфедерацияси (АСС)нинг Конгресслари бўлиб ўтди. 

Осиё Велоспорт конфедерациясининг (АСС) Конгрессида Ўзбекистон Республикаси Бош вазири ўринбосари, Ўзбекистон велосипед спорти Федерацияси раиси Танзила Нарбаева Халқаро Велосипедчилар Иттифоқи (UCI) ҳамда Осиё Велоспорт Конфедерацияси (АСС) томонидан махсус сертификат ва велоспортни аёллар ўртасида тарғибот ва ташвиқот қилишда қўшган хиссаси учун махсус медаль билан тақдирланди. 

Ўзбекистон велосипед спорти федерацияси матбуот хизмати