Велоспорт. Икки муҳим Меморандум имзоланди

Ўзбекистон Велосипед спорти Федерацияси раисининг биринчи ўринбосари Козим Ўринбойхўжаев Осиё велоспорт Конфедерацияси Президенти Осама Аҳмад Ал Шафарнинг таклифига кўра БААга хизмат сафари уюштирди.

Учрашув чоғида Ўзбекистон велосипед спорти Федерацияси ва Осиё велоспорт Конфедерацияси, БАА велосипед спорти Федерацияси ўртасидаги ҳамкорликни кучайтириш масалалари муҳокама қилинди.

Шунингдек, Козим Ўринбойхўжаев Ёшлар ва спорт қўмитаси раиси Юсуф ал Салкар билан учрашиб, икки мамлакат ўртасидаги ўзаро тажриба алмашинувини йўлга қўйиш борасида ҳам келишувга эришилди.

Учрашув давомида Козим Ўринбойхўжаев ва Осама Аҳмад Ал Шафар Ўзбекистон велосипед спорти Федерацияси ва Осиё велоспорт Конфедерацияси ҳамда БАА велосипед спорти Федерациясининг ҳамкорлик тўғрисидаги Меморандумини имзоладилар.

Ушбу Меморандум БАА ҳамда Ўзбекистон велоспортчилари ўртасида икки томонлама ўқув-машғулот йиғинларини ўтказиш, мусобақаларда иштирок этиш, тегишли мутахассис ва экспертларига ўқув курслари, семинар ва конференцияларда иштирок этиш имконини беради.

Бундан ташқари, Ўзбекистон терма жамоасининг хорижда малака ошириши, тажриба алмашиши, нуфузли мусобақаларда иштирок этишини йўлга қўйиш, мураббийлар учун халқаро йиғинларни ташкил этиш бўйича ҳам ҳамжиҳатликда ишлашга келишиб олдилар.

“Осиё велоспорт Конфедерацияси ҳамда БАА велосипед спорти Федерацияси билан имзоланган Меморандум юртимизда велосипед спортини янада ривожланишига хизмат қилади, - деди Козим Ўринбойхўжаев.