Велоспорт: Осиё чемпионлари юртимизга қайтиб келишди

Мусобақада қитъамизнинг 25 дан ортиқ давлатидан 700 нафарга яқин спортчи иштирок этди. Кеча Осиё чемпионатида муваффақиятли иштирок этган велоспортчиларимиз юртимизга қайтиб келишди. 

Уларни Ислом Каримов номидаги Тошкент халқаро аэропортида Жисмоний тарбия ва спорт вазирлиги ва Миллий олимпия қўмитаси мутасаддилари, шунингдек, Ўзбекистон велосипед спорти федерацияси ходимлари, ёш велоспортчилар ва оммавий ахборот воситалари вакиллари тантанали кутиб олишди.

Маълумот учун, Ўзбекистон миллий терма жамоаси Жанубий Кореянинг Чинчон шаҳри мезбонлик қилган катталар ва ўсмирлар ўртасидаги Осиё чемпионатида 1 та олтин ва 1 та бронза медалини қўлга киритди.

Шуни ҳам алоҳида таъкидлаш жоиз, аёллар ўртасида очколар бўйича гуруҳ пойгаси йўналишида иштирок этган ҳамюртимиз Ольга Забелинская энг юқори натижа қайд этиб, Осиё чемпионлигини қўлга киритди. Худди шу йўналишда ўсмирлар ўртасида кечган пойгада иқтидорли спортчи Беҳзодбек Раҳимбоев эса бронза медалига сазовор бўлди.