Велоспорт: юртимизда Осиё чемпионати ўтказилади

Ўзбекистон Республикаси Жисмоний тарбия ва спорт вазирлиги, Миллий олимпия қўмитаси, Халқаро велосипедчилар иттифоқи (UCI), Осиё велоспорт конфедерацияси (АСС) ҳамда мамлакатимиз велоспорт федерацияси томонидан ташкил этилаётган ушбу мусобақада ўсмирлар, катталар ва паралимпиячилар ўртасида ғолиблар аниқланади.

Унда Хитой, Япония, Жанубий Корея, Ҳиндистон, Вьетнам, Гонконг, Малайзия, Филиппин, Таиланд, Мўғулистон, БАА, Иордания, Эрон, Саудия Арабистони, Яман ва Ливан каби 36 мамлакатдан 500 нафардан ортиқ велопойгачилар иштирок этади.

Шунингдек, Осиё чемпионатида эркаклар ва аёллар 2020 йилда Токиода бўладиган навбатдаги ёзги Олимпия ўйинлари йўлланмалари учун ҳам ўзаро рақобатлашади.

Мусобақа доирасида жорий йил 26 апрель куни Тошкент шаҳридаги “International Hotel Tashkent” меҳмонхонасида Осиё велосипед спорти конфедерациясининг навбатдаги Конгресси ҳам ўтказилади.

Осиё чемпионатига Халқаро велосипедчилар иттифоқи (UCI) раиси Давид Лапартьен ва Осиё велоспорт конфедерацияси (АСС) раиси Осама Аҳмад Ал-Шафар раҳбарлигидаги нуфузли делегацияларнинг ташрифи кутилмоқда.

Мазкур нуфузли мусобақани жаҳон стандартига мос равишда юқори савияда ташкил этиш, техник ва амалий ёрдам кўрсатишда Германиянинг “Inflame Sports GbR” фирмаси билан яқиндан ҳамкорлик қилинади.