08 фев 08:43
Янгиликлар

Велоспорт

Велоспортчиларимиз Осиё чемпионатини олтин медаль билан бошлашди

Кеча Таиланднинг Пхитсанулок провинциясида велоспортнинг шоссе йўналиши бўйича катталар, ёшлар ва параспортчилар ўртасида Осиё чемпионати бошланганди.

Бугун паравелоспортчилар ўртасида индивидуал вақт дастури ташкил этилган бўлса, сўнгра навбат ёшлар ва катталар ўртасидаги аралаш эстафетага етди.

Қувончлиси, Артур Стрельцов, Муҳриддин Сапаров, Виталий Бурлаков, Роксана Ҳикматова, Самира Исмоилова, Яна Мишиновадан иборат ёшлар терма жамоамиз эстафетадаги энг яхши натижани қайд этган ҳолда олтин медалга эга чиқди. Иккинчи ўринни қозоғистонликлар эгаллаган бўлса, бронза медаллари мезбонларга насиб этди.

Бу терма жамоаларимизнинг мусобақадаги илк медалига айланди.

Аввалроқ, паравелоспортчиларимиз илк кун доирасида 7 та олтин, 4 та кумуш ва 2 та бронза медали билан якунлагани ҳақида хабар берган эдик.