Велоспортчиларимизнинг Осиё чемпионатидаги медаллари 4 тага етди

Мусобақада иштирок этаётган Ўзбекистон терма жамоаси аъзолари ҳозирга қадар 3 та олтин ва 1 та бронза медалларини қўлга киритиб, умумжамоа ҳисобида биринчи ўринни эгаллаб турибди.

Ёдингизда бўлса, 7 февраль санасида турнирнинг илк куни доирасида ёшларимиз аралаш эстафетада тенгсиз бўлганди. Орадан бир кун ўтиб, Самира Исмоилова яккалик дастурида олтин медалга эга чиқди.

Кеча эса аёллар ўртасида ўтказилган индивидуал вақт дастурида тажрибали Янина Кускова олтин медални қўлга киритди. Мазкур дастурнинг U-23 ёш тоифасида ташкил этилган пойгасида эса Асал Ризаева учинчи натижани қайд этиб, бронза медалини ҳисобимизга қўшиб қўйди.

Шундай қилиб, делегациямизнинг мусобақа доирасида қўлга киритган медаллари сони 4 тага етди: 3 та олтин ва 1 та бронза.