Велоспортчимиз Петропавлоскдаги халқаро мусобақада учта медаль қўлга киритди

Мазкур нуфузли велопойгада Россия, Озарбайжон, Белорусь, Украина, Молдова, Козоғистон, Қирғизистон, Тожикистон ҳамда Ўзбекистондан ташриф буюрган 140 нафардан ортиқ спортчилар ва 16та жамоа иштирок этди. Мусобақада Б.Исматов, Д.Бочаров, А.Гафаров, С.Гореликов, Б. Раҳимов ва Д.Сирко каби велоспортчилар катта мураббий Б.Нуратдинов бошчилигида совринли ўринлар учун кураш олиб бордилар. 

Кўпкунлик беллашувлар якунига кўра ҳамюртимиз Дмитрий Сирко турли йўналишларда иккита олтин, битта бронза медалларини қўлга киритди. Ушбу ғалаба орқали терма жамоамиз 16та жамоа ичида иккинчи ўриндан жой олди.

“Ушбу велопойгада илк маротаба иштирок этдим. Баҳсларда кучли спортчиларнинг иштирок этгани менга янада маъсулият юклади. Боз устига, биринчи босқич пойгалари вақтида ёққан кучли ёмғир баҳсларни қийинлаштирди. Шунга қарамай, ўша пойгада учинчи ўринни эгаллай олдим. Қолган йўналишларда эса олтин медалларга сазовор бўлдим” – деди Сирко.